کافی دنیا بھر میں سب سے زیادہ پسند کی جانے والی مشروبات میں سے ایک ہے۔ اس میں موجود کیفین کی وجہ سے لوگ نہ صرف اس کا ذائقہ پسند کرتے ہیں۔ بلکہ اسے توانائی بڑھانے، دماغ کو متحرک کرنے اور صحت میں مجموعی بہتری لانے کے لیے بھی استعمال کرتے ہیں۔
کیا آپ جانتے ہیں کہ کافی صحت کے لیے کتنی فائدہ مند ہو سکتی ہے؟ اور یہ کس طرح آپ کو جسمانی و دماغی بیماریوں سے بچانے میں مدد فراہم کرتی ہے؟ اس بلاگ میں، ہم آپ کو کافی کے 10 حیرت انگیز فوائد کے بارے میں تفصیل سے بتائیں گے۔
کافی کے فوائد
تو چلیے پھر کافی کے فوائد پر بات کرتے ہیں۔ جن کو جاننے کے بعد آپ کے پاس کوئی آپشن نہیں ہو گا مگر یہ کہ آپ کافی استعمال کرنا شروع کر دیں۔
توانائی میں اضافہ اور دماغی افعال میں بہتری
کافی میں موجود کیفین ایک قدرتی دماغی محرک ہے جو آپ کی توانائی کی سطح کو بڑھاتی ہے۔ اور دماغی افعال کو بہتر کرتی ہے۔ یہ آپ کی توجہ، ردعمل کے وقت، یادداشت اور عمومی ذہنی کارکردگی کو بہتر بنانے میں مددگار ثابت ہوتی ہے۔
کافی پینے کے بعد کیفین خون میں شامل ہو کر دماغ تک پہنچتی ہے۔ جہاں یہ ایڈینوسین نامی نیورو ٹرانسمیٹر کو بلاک کرتی ہے، جس سے دوسرے نیورو ٹرانسمیٹرز جیسے ڈوپامین اور نوریپینفرین کی سطح میں اضافہ ہوتا ہے۔ اس کا نتیجہ زیادہ توجہ اور ارتکاز کی صورت میں نکلتا ہے۔
جسمانی کارکردگی میں اضافہ
کافی جسم میں ایڈرینالین ہارمون کو بڑھاتی ہے، جو جسمانی کارکردگی کو بہتر بناتا ہے۔ یہی وجہ ہے کہ بہت سے کھلاڑی ورزش سے پہلے کافی پینا پسند کرتے ہیں۔ تاکہ ان کی برداشت اور کارکردگی میں اضافہ ہو۔
کیفین چربی کو توڑنے میں مدد دیتی ہے اور اسے توانائی کے طور پر استعمال کرنے کے قابل بناتی ہے، جس سے ورزش کے دوران کارکردگی میں مزید بہتری آتی ہے۔
وزن کم کرنے میں مددگار
کافی جسم کے میٹابولزم کو تیز کرتی ہے اور چربی جلانے کے عمل کو بڑھاتی ہے۔ تحقیق سے ثابت ہوا ہے کہ کیفین میٹابولزم کی شرح کو 3 سے 11 فیصد تک بڑھا سکتی ہے۔
بہت سی چربی جلانے والی سپلیمنٹس میں کیفین ایک اہم جزو ہوتا ہے کیونکہ یہ جسم کی کیلوریز جلانے کی صلاحیت کو بڑھاتا ہے۔ البتہ، کافی کے زیادہ استعمال سے اس کا اثر کم ہو سکتا ہے، اس لیے اعتدال میں رہنا ضروری ہے۔
ذیابیطس کے خطرے میں کمی
تحقیقات کے مطابق، جو لوگ روزانہ کافی پیتے ہیں، ان میں ٹائپ 2 ذیابیطس کا خطرہ کم ہوتا ہے۔ کافی میں موجود اینٹی آکسیڈنٹس انسولین کی حساسیت کو بہتر بناتے ہیں اور خون میں شوگر کی سطح کو کنٹرول میں رکھتے ہیں۔
ایک تحقیق کے مطابق، کافی پینے والے افراد میں ٹائپ 2 ذیابیطس کا خطرہ 23 سے 50 فیصد تک کم ہو سکتا ہے، اور بعض ریسرچز میں یہ تعداد 67 فیصد تک بھی پہنچتی ہے۔
دل کی صحت میں بہتری
کافی کا مناسب استعمال دل کی صحت کے لیے مفید ثابت ہو سکتا ہے۔ یہ بلڈ پریشر کو کنٹرول میں رکھتی ہے اور دل کی بیماریوں کے خطرے کو کم کرتی ہے۔
البتہ، کچھ افراد میں کافی وقتی طور پر بلڈ پریشر بڑھا سکتی ہے، اس لیے اگر آپ کو ہائی بلڈ پریشر کا مسئلہ ہے تو اعتدال میں رہنا ضروری ہے۔
جگر کی حفاظت
کافی جگر کے لیے بہت مفید ہے۔ یہ جگر کو نقصان پہنچانے والے امراض جیسے کہ فیٹی لیور، ہیپاٹائٹس اور جگر کے کینسر سے بچانے میں مددگار ثابت ہوتی ہے۔
کافی پینے والے افراد میں جگر کے مسائل کا خطرہ 80 فیصد تک کم ہو سکتا ہے۔ جگر انسانی جسم کا ایک انتہائی اہم اعضاء ہوتا ہے۔ اگر آپ کوخدا نخواستہ آپ کو جگر کے مسائل لاحق ہو جائیں تو یہ موت کی وجہ بھی بن سکتے ہیں۔
اس لیے صحت مند زندگی گزارنے کے لیے آپ کو اپنے جگر کو صحت مند رکھنا ہو گا۔ جگر کو صحت مند رکھنے کے لیے آپ کو کافی استعمال کرنا ہو گی۔
ڈیپریشن کے خطرے میں کمی
کافی کا استعمال ڈیپریشن کے خطرے کو کم کرتا ہے اور موڈ کو بہتر بناتا ہے۔ یہ دماغ میں خوشی پیدا کرنے والے نیورو ٹرانسمیٹرز جیسے کہ سیروٹونن اور ڈوپامین کو بڑھاتی ہے۔ جس سے آپ کے خوشی کے احساس میں اضافہ ہوتا ہے۔
ایک تحقیق کے مطابق، روزانہ 4 یا اس سے زیادہ کپ کافی پینے والے افراد میں ڈیپریشن کا خطرہ 20 فیصد تک کم ہو سکتا ہے۔
پارکنسن اور الزائمر سے بچاؤ
کافی کے فوائد میں یہ بھی شامل ہے کہ یہ پارکنسن اور الزائمر جیسی دماغی بیماریوں سے بچاؤ میں مدد کرتی ہے۔ کافی میں موجود اینٹی آکسیڈنٹس دماغی خلیات کو نقصان سے بچاتے ہیں اور یادداشت کو بہتر بناتے ہیں۔
الزائمر اور پارکنسن کا کوئی مکمل علاج موجود نہیں، لیکن کافی کے استعمال سے ان امراض کے خطرے کو کم کیا جا سکتا ہے۔
اینٹی آکسیڈنٹس سے بھرپور
کافی اینٹی آکسیڈنٹس کا ایک بہترین ذریعہ ہے جو جسم میں مضر فری ریڈیکلز کو ختم کرکے بیماریوں سے بچاؤ میں مددگار ثابت ہوتے ہیں۔
اینٹی آکسیڈنٹس جسم کو مختلف بیماریوں، جلد کی عمر رسیدگی اور دیگر مسائل سے محفوظ رکھتے ہیں۔ کافی کے فوائد کی وجہ یہی اینٹی آکسیڈنٹس ہوتے ہیں۔ یہ آپ کو ہر موسم میں صحت کو برقرار رکھنے میں مدد دیتے ہیں۔ جس سے آپ کو ہسپتالوں میں خوار نہیں ہونا پڑتا۔
لمبی عمر میں مددگار
کافی کے فوائد میں یہ بھی شامل ہے کہ اسے پینے والے افراد میں قبل از وقت موت کا خطرہ کم ہوتا ہے۔ مختلف مطالعات کے مطابق، جو لوگ روزانہ کافی پیتے ہیں، ان میں کئی بیماریوں سے مرنے کا خطرہ کم ہو جاتا ہے۔
کافی کے ممکنہ نقصانات
اگرچہ کافی صحت کے لیے فائدہ مند ہے، لیکن زیادہ مقدار میں کیفین لینے سے بے چینی، نیند کے مسائل، ہائی بلڈ پریشر اور معدے کی خرابی جیسے مسائل پیدا ہو سکتے ہیں۔ اس لیے متوازن مقدار میں کافی کا استعمال کریں۔
کچھ آخری الفاظ
کافی نہ صرف توانائی فراہم کرتی ہے بلکہ کئی صحت بخش فوائد بھی رکھتی ہے۔ البتہ، اس کا مناسب مقدار میں استعمال ضروری ہے کیونکہ زیادہ کیفین کے مضر اثرات بھی ہو سکتے ہیں۔ اگر آپ ابھی تک کافی نہیں پیتے تو شاید یہ وقت ہے کہ آپ اسے اپنی روزمرہ کی زندگی کا حصہ بنائیں اور اس کے فوائد سے مستفید ہوں۔ مزید معلومات جاننے کے لیے مشورہ کی ایپ ڈاؤن لوڈ کریں یا پھر ہماری ویب سائٹ وزٹ کرتے رہیں۔
